mwanzo Habari Kitaifa Kitaifa Uwaziri mkuu ni moto

Dodoma. Waziri Mkuu wa Jamhuri ya Muungano wa Tanzania, Mizengo Pinda amesema kuwa nafasi hiyo siyo ya kuing’ang’ania au kuililia kwa kuwa ni kama moto.

Pinda alitoa kauli hiyo katika mahojiano maalumu yaliyofanyika nyumbani kwake mjini Dodoma ambapo alieleza kuwa nafasi ya uwaziri mkuu ina mambo mengi hasa yenye changamoto zikiwamo za kiuchumi na ya kuondoa wananchi katika umaskini.

“Aah, uwaziri mkuu moto rafiki yangu,” alisema Pinda huku akicheka na kufafanua:

“Nafasi hizi za uongozi, Mungu wangu. Nafasi hizi za uongozi zina mambo mengi, hasa mnapokuwa mnajaribu kumsaidia kiongozi wa nchi kuongoza nchi ambayo ina changamoto nyingi hasa za kiuchumi.

“Kimsingi nchi yetu bado maskini, huku tunahangaika kusaidia nchi tuondoke katika umasikini, lakini wakati huohuo, uwezo wa kutuondoa, nayo ni changamoto.”

Pinda aliyekuwa akijibu swali lililotaka kujua changamoto za nafasi yake ya uwaziri mkuu, alieleza kuwa changamoto ya kwanza kwa nafasi hiyo ni namna ya kumsaidia Rais aweze kulivusha na kuliondoa taifa katika dimbwi la umaskini na kuliweka kwenye hali ya neema.

Alisema kuwa katika hali hiyo ndiyo sababu Serikali ya Rais Jakaya Kikwete imekuja na mpango unaoendelea wa kuweka vipaumbele vichache kwa wakati na kuvipa umuhimu ili kuondoa umaskini na kuwapeleka wananchi katika hatua nyingine zaidi kimaendeleo.

“Kazi siyo nyepesi kama inavyosemwa, lakini ukimwezesha mwananchi anaweza kufanya vizuri katika mambo mengi; katika elimu na afya, lakini kiutendaji siyo jambo rahisi.

“Changamoto kubwa ninayoiona ni namna ya kuwaondoa wananchi katika dimbwi la umaskini, kiutendaji siyo kazi ndogo, lakini lazima tufike huko. Bajeti ndogo, matatizo mengi, wizi, mimi hiyo naona ndiyo changamoto ya msingi zaidi, hivyo ni lazima kuwa na vipaumbele vichache,” alisema.

Akizungumzia majaribio ya wabunge kutaka kumng’oa madarakani kwa kumpigia kura ya kutokuwa na imani naye, Pinda alisema kuwa hali hiyo ni changamoto, lakini hakutishika kwa sababu anafahamu nafasi aliyonayo siyo ya kung’ang’ania, bali ni dhamana tu.

“…Ni changamoto, lakini unajua uzuri wa vitu hivi, nafasi hizi ni dhamana tu, kiongozi wa nchi anakuamini, anaamini utamsaidia katika jukumu alilotaka, anakupa. Ukipewa siyo jambo la kufa na kupona, siyo kitu cha kung’ang’ania, chako...chako...chako,”alisema akiongeza:

“ Hii ni dhamana tu, siyo cha kufikiri ni kitu chako, ndiyo maana sikutishika, lakini ni changamoto kwa maana kwamba wenzako wanafanya wewe ubaini maeneo ambayo unatakiwa kuongeza nguvu katika kuyatekeleza, tukifanya hivyo tutafika mbali.”