'Azam,Simba,Mbeya City mtajibeba'

YANGA kupitia kwa Kocha Mkuu wake,  Marcio Maximo, imechimba mkwara na kuwatangazia wapinzani wake wakubwa ambao ni Simba, Azam na Mbeya City kwamba kazi imeanza rasmi uwanjani na yale waliyokuwa wakiyaona kwenye mechi za kirafiki ni rasharasha tu.

Kwa kusisitiza wana Jangwani  hao wametamba kwamba Azam watajibeba kesho Jumapili kwa kukumbana na makali yao kwenye mechi ya Ngao ya Hisani ndani ya Uwanja wa Taifa.

Mchezo huo unaashiria ufunguzi wa msimu mpya wa Ligi Kuu Bara ambapo Yanga msimu uliopita ilishika nafasi ya pili na Azam ambayo ni klabu tajiri zaidi nchini na Afrika Mashariki ikatwaa ubingwa.

Azam ipo kambini katika hosteli zake za Chamazi ikijifua chini ya Kocha wao Mcameroon  Joseph Omog ambapo licha ya kumkosa nahodha wake ambaye pia ni mshambuliaji muhimu, John Bocco, bado kikosi hicho kina nguvu ya wachezaji wapya walioongezwa kama Didier Kavumbagu, Leonel Saint-Preux na Ismaila Diara na  beki anayenyumbulika Shomari Kapombe. Azam ilijinoa kwa kushiriki Kombe la Kagame na Yanga ikapiga kambi Pemba.

“Tutamkosa Bocco ambaye bado anauguza goti lake, wachezaji wangu wengine wako sawa tutacheza mpira wetu tunaocheza wakati wote, tunawaheshimu Yanga lakini tutapambana nao,”alisema Omog ambaye ndiye kocha anayelipwa mshahara mkubwa zaidi nchini.

Yanga yenyewe ipo katika hoteli ya Tansoma iliyopo Gerezani, Kariakoo na inafanya mazoezi katika uwanja wenye vipara wa Shule ya Sekondari Loyola, lakini huenda ikamkosa Mbrazil Andrey Coutinho ambaye ana maumivu ya kifundo cha mguu huku mshambuliaji wake mpya, Genilson Santos ‘Jaja’ akiwa fiti tayari kuwakimbiza mabeki wa Azam, David Mwantika na Aggrey Morris.

Maximo alisema: “Azam ni timu nzuri imefanikiwa kujijenga kwa kuwa na vifaa vya kutosha na benchi zuri la ufundi, tunawaheshimu lakini kwetu sisi tunatambua ligi itaanza Septemba 20 lakini kwetu ligi tutaanza Jumapili dhidi ya Azam.

“Kila mchezaji wangu anajua umuhimu wa mchezo huo, lakini pia kila mmoja anajua majukumu yake, hatuoni kitu kinachoweza kutunyima ushindi, tunakwenda kupambana njooni muone nini tutakifanya katika mchezo huo tunaamini itakuwa mechi nzuri.”

 Waamuzi wa mchezo huo ni Simon Mbelwa (Tanga) atakayepuliza kati kwa usaidizi wa Samuel Mpenzu (Arusha) na Charles Simon (Dodoma).

Maximo atetea  kujihami

Maximo amefafanua, anapenda kutumia viungo wengi katika timu ambayo ndiyo staili yake kama ulivyo mpira wa Kibrazili.

“Ni kweli tunashinda kwa mabao machache moja au mbili hii ni kutokana na mfumo wangu ninaotumia kwa kuchezesha viungo wengi. Napenda kuiimarisha timu kuanzia nyuma kwenye beki, viungo hadi mbele,” alisema.