VODACOM WATOA ZAWADI KWA MCHEZAJI BORA WA MWEZI‏

Mkuu wa Wilaya ya Mbeya mjini Dr. Norman Sigala(mwenye suti nyeusi)pamoja na Mchezaji bora wa Mwezi wa Septemba wa Ligi kuu ya Vodacom Tanzania bara Anthony Matogolo wa timu ya Mbeya City (kushoto)wakionesha hundi yenye thamani ya Tsh Milioni 1/= kwa mashabiki wa timu yake mara baada ya kukabidhiwa rasmi na  Mkuu wa wilaya hiyo kwa niaba ya wadhamini wakuu wa ligi kuu Vodacom Tanzania hapo jana kabla ya mechi kuanza baina ya timu Mbeya City na  Azam FC,Ambapo Azam FC iliilaza Mbeya City kwa goli moja bila na anaeshuhudia kulia ni Katibu wa chama cha mpira wa miguu mkoa wa Mbeya(MREFU) Seleman Harub.  

Mchezaji bora wa mwezi Septemba wa ligi kuu ya Vodacom Tanzania bara wa timu ya Mbeya City Anthony Matogolo akiwaonesha mashabiki wa nyumbani Ngao aliyokabidhiwa na Mkuu wa wilaya ya Mbeya mjini Dr.Norma Sigala(kushoto)kwa niaba ya wadhamini wakuu wa ligi Vodacom Tanzania pamoja na hundi yenye thamani ya Tsh Milioni 1/= kabla ya kuanza kwa mechi kati ya timu ya Azam FC na Mbeya City hapo jana/juzi ambapo Azam FC iliilaza Mbeya City goli moja bila.

Mtanange ukiendelea katika ligi kuu ya vodakom katika Uwanja wa Sokoine.

Wachezaji wa timu ya Azam FC wakishangilia goli lao lililofungwa na  Aggrey Morris katika mzunguko wa Ligi kuu ya Vodacom Tanzania bara kati ya timu hiyo na Mbeya City hapo jana/juzi Azam FC iliilaza Mbeya City kwa goli moja bila.

Na Mwandishi Wetu, Mbeya

WADHAMINI wakuu wa Ligi Kuu ya Vodacom Tanzania Bara (VPL), Kampuni ya Huduma za Mawasiliano ya Vodacom imekabidhi zawadi ya Sh. milioni moja kwa mchezaji bora wa mwezi uliopita wa ligi hiyo, Antony Matogolo wa Mbeya City.

Makabidhiano hayo yalifanyika muda mfupi kabla ya mechi ya raundi ya nne kati ya Mbeya City na Azam FC kwenye Uwanja wa Kumbukumbu ya Sokoine mjini hapa jana.

Kabla ya kukabidhi zawadi hiyo, Meneja wa Vodacom Tanzania Kanda ya Mbeya, Emmanuel Sagenge, alisema kampuni hiyo itakuwa ikitoa zawadi kila mwezi kwa mchezaji anayefanya vizuri.

“Ligi Kuu ya Vodacom msimu huu ina ushindani mkubwa, nasi (Vodacom Tanzania) kwa kushirikiana Bodi ya Ligi Kuu (TPLB) tutakuwa tunatoa zawadi kwa mchezaji anayeng’ara kila mwezi na leo (jana) tunatoa Sh. Milioni moja kwa Antony Matogolo,” alisema Sagenge.

Baada ya kukabidhiwa zawadi hiyo, Mtogolo aliyeonekana mwenye furaha,alisema; “ninawashukuru wachezaji na mashabiki wa Mbeya City kwa ushirikiano wanaonipa, hii ni zawadi kwa timu nzima na mashabiki wa timu yetu.”

Aidha, wadau wa Mbeya City waliungana na Vodacom Tanzania katika hafla hiyo ya utoaji zawadi na kukabidhi zawadi ya fedha kwa kocha bora msimu uliopita, Juma Mwambusi wa Mbeya City huku wakitoa fungu pia kwa Matogolo.

Matogolo aliiongoza Mbeya City katika mechi mbili za mwezi uliopita walitoka suluhu dhidi ya JKT Ruvu Septemba 20 kabla ya kushinda 1-0 dhidi ya Coastal Union Septemba 27.

Katika mechi ya jana, Mbeya City ilifungwa goli 1-0 dhidi ya mabingwa watetezi Azam FC. Goli la Wanalambalamba lilifungwa na beki wa kati Aggrey Morris kwa shuti kali la faulo dakika nne baada ya robo saa ya mchezo.